តាមរយៈត្រេល័ររឿង « សួស្តីអ្នកជិតខាង» បានធ្វើឱ្យទស្សនិកជនជាច្រើនចាប់អារម្មណ៍ និងទន្ទឹងរងចាំទស្សនារឿងនេះគ្រប់ៗគ្នា ពីព្រោះតែរឿងនេះជាប្រភេទរឿងស្នេហានិយាយទំនាក់ទំនងបុរសស្រឡាញ់ភេទដូចគ្នា ដែលបានស្រឡាញ់គ្នាក្នុងអំឡុងពេលបិទខ្ទប់ក្នុងពេលផ្ទុះកូវីដ ១៩ ត្រឹមតែ ១៤ ថ្ងៃធ្វើឱ្យពួកគេចាប់ចិត្តអ្នកជិតខាងគ្នាឯង។  ជាក់ស្តែងវត្តមានលោក នូ ឧសភា និងលោក វុធ ថុង ក្នុងរឿងនេះកំពុងធ្វើឱ្យ កក្រើកអស់ពិភពសិល្បៈ ។  

រឿង « សួស្តីអ្នកជិតខាង » គឺជាស្នាដៃនិន្ធរបស់លោក នួន ម៉ូលីន ដែលជាអ្នកនិពន្ធល្បីឈ្មោះក្នុងរឿងជាច្រើនមកហើយរបស់ផលិតកម្ម LD  Picture ។ លោក នួន ម៉ូលីន បានឱ្យដឹងថា រឿង « សួស្តីអ្នកជិតខាង » គឺជាស្នាដៃទី ៣ របស់លោកសម្រាប់ដាក់បញ្ចាំងនៅរោងភាពយន្ត រឿងនេះដែរលោកនិពន្ធឡើង ដើម្បីកុំឱ្យមានការរើសអើងចំពោះអ្នកដែលស្រឡាញ់ភេទដូចគ្នា ។

ចំណែកលោក លៀក លីដា ដែលជាចាងហ្វាងផលិតកម្ម LD Picture វិញក៏បានឱ្យផងដែរថាក្នុងឆ្នាំ ២០២២ នេះ ផលិតកម្ម  LD បានផលិតរឿងល្អៗជិត ១០ រឿងសម្រាប់ដាក់បញ្ចាំងនៅរោងភាពយន្ត រាល់ស្នាដៃរបស់យើងមិនដែលរំពឹងថា នឹងទទួលបានការគាំទ្រខ្លាំងនោះទេ ទាល់តែអ្នកទៅទស្សនាផ្ទាល់ទើបដឹងច្បាស់ ។

 សម្រាប់សិល្បករល្បីៗដែលបានចូលរួមសម្ពោធរឿង « សួស្តីអ្នកជិតខាង » នោះ រួមមាន កញ្ញា ទេព បូព្រឹក្ស , សារ៉ាយ សក្ខណា , ទឹម រដ្ឋា , ស៊ីណូរ៉ា , ប៊ីរីយ៉ា , សុភ័ក្រ្ត កុសម៉ា និងតារាជាច្រើនរូបទៀត ។ សារ៉ាយ សក្ខណា និង សុភ័ក្រ្ត កុសម៉ា បានបង្ហាញពីចំណាប់អារម្មណ៍របស់ពួកគេថា ពួកគេពិតជាសប្បាយចិត្តដែលបានចូលរួមគាំទ្រភាពយន្ត ខ្មែរ ។ ថ្ងៃនេះគឺអ្នកទាំងពីមកគាំទ្រតារាប្រុសវ័យក្មេង ថុងថុង ។